1. Alfabet

L’alfabet furlan al cjape dentri dutis lis letaris di chel talian, in plui al à une letare modificade, ç - il ci cu la cedilie - (çate - piçul - bêç).

A	a	a
B	b	bi
C	c	ci
Ç	ç	ci cu la cedilie
D	d	di
E	e	e
F	f	efe
G	g	gji
H	h	ache
I	i	i
J	j	i lunc
K	k	cape
L	l	ele
M	m	eme
N	n	ene
O	o	o
P	p	pi
Q	q	cu
R	r	ere
S	s	esse
T	t	ti
U	u	u
V	v	vi
W	w	vi dopli
X	x	ics
Y	y	i grêc, ipsilon
Z	z	zete

2. I digrams cj & gj

Doi particolârs digrams cuntun valôr consonantic, cj, gj, a rapresentin il c e il g postpalatâi, tipics de lenghe furlane. Il digram cj si cjatilu in cualsisei posizion (cjan, rincjin, ducj); gj si cjatilu dome in principi (gjat) e in cuarp di peraule (mangjâ). Il digram cj in fin di peraule si lassilu intat (tancj, dincj ...); se daspò di cj o gj si à la letare i, si scuen scrivile, parcè che il digram al è di considerà un dutun (cussì si varà psicologjiche, impen di psicologjche; cjicare, impen di cjcare ...). Come chei altris digrams (ch, gh, gn, ss) - ai efiets de separazion des peraulis in fin di rie - cj e gj a contin come une letare sole.

3. I trê suns dal zete e l’ûs di k, q, w, x e y

La letare zete e à trê valôrs: 1) zone, 2) zovin, 3) associazion, ch’a corispuindin - rispietivamentri - ai suns che si cjatin tes peraulis talianis 1) zoo, 2) giovane, 3) lozione .

Lis letaris k, q, w, x, e y si doprilis nome te scriture di peraulis forestis no adatadis e tai lôr derivâts: Kant, kantian. Ma la letare q si doprile - denant di u - ancje tai toponims e te onomastiche storiche furlane (Aquilee, Marquart).

4. I acents in gjenerâl

Lis vocâls a puedin vignî modificadis dal acent dopli - o circonflès - (â), oben dal acent grâf (à). [N.B. Sul computer la scriture svelte dai acents doplis si le fâs tignint fracât Alt e digjitant: 131 (â); 136 (ê); 140 (î); 147 (ô); 150 (û)].

5. L’acent grâf

L’acent grâf si doprilu par segnâ la vocâl toniche curte ta chescj câs:

a) Su la vocâl de silabe finâl des peraulis di plui di une silabe che a finissin par vocâl (à, è, ì, ò, ù), oben par vocâl + s (-às, -ès, -ìs, -òs, -ùs.): al fevelà, al fevelàs, cumò, e disè, e disès, tribù, parùs.

b) Su la vocâl i de terminazion verbâl toniche in, tes formis di plui di une silabe. Si conserve  l’acent denant dai pronons in enclisi: o viodìn, o cjantarìn, viodìnlu, cjantarìno?

c) Intune liste limitade di peraulis di une silabe par distinguilis dai lôr omografs: al è, al à, a àn, il dì, sì, là, sù, jù (averbis).

d) Par fâ viodi che i o u a son tonics daûr di une altre vocâl, dulà che, daûr de grafie, si podarès falâ te leture: aìne, caìn, caìe, criùre, o vaìi, liùm.

6. L’acent dopli (circonflès)

La presince dal acent dopli [^] sore di une vocâl (p.e. normâl), indi slungje il sun (si leiarà: normàal). Dut câs, no si segne mai la lungjece des vocâls in cuarp di peraule (mari, plere, nole...), ma nome chê des vocâls de silabe finâl (o starês, savôr, cocâl ...). E fâs ecezion la peraule pôre.

Ocjo! L’acent dopli, denant dai pronons in enclisi e te composizion, si manten, ancje se al passe in cuarp di peraule: donâur, leiarêso?...

Par convenzion, il numar 3 si scrivilu cul acent dopli sul e (trê).

7. L’acent dopli denant di r finâl

L’acent dopli no si scrivilu denant di r finâl tes peraulis dulà che la pronunzie lungje no je gjenerâl in dutis lis varietâts che a àn vocâls lungjis, ancje se cheste pronunzie e je carateristiche de coinè. Cussì o scrivarìn: cjâr (caro) e cjar (carne, carro). Ma in coinè o pronunziarìn simpri compagn.

La aparizion di un m o di un n tes peraulis de stesse famee morfologjiche o la presince di rr te peraule taliane a son un segnâl che no si à di scrivi l’acent circonflès: fer - ferme, ferro;; al duar - durmî; cjar - cjarnâl; cuar - cuarnâ; cjar (carro); al cor (corre).

8. I Infinîts

Lis vocâls finâls dai infinîts de prime, seconde e cuarte coniugazion e dai nons derivâts dai infinîts a àn simpri l’acent dopli: studiâ, il studiâ; savê, il savê; capî, il capî ...

9. Altris regulis sui acents

Cualchi volte l’acent dopli o chel grâf si dopriju par disferenziâ peraulis compagnis, ma cun diviers significât:

a (prep.) - à (verp); che (pron., it.: che ) - chê (adi. o pron., it.: quella);  di (prep.) - dì (non) - dî (verp); e (con.) - è (verp); ju (pron.) - jù (av.); la (art.) - là (av.) - lâ (verp); si (pron.) - sì (av.); su (prep.) - sù (av.); to (pron., it.: tuo) - tô (pron., it.: tua) ...

10. La letare j

La letare j si doprile dome in principi di peraule (judizi, jessi...). Par regule si scrîf j impen di i cuant che al è part di un diftonc. Tes peraulis componudis si manten la letare j ancje in cuarp di peraule: judizi - prejudizi; ju - doprâju ...

11. -àia, -àie, -àio, -òie, -ie

Jenfri a tonic e a, e, o atons e jenfri o tonic e e aton, si scrîf l’i che al comparìs te pronunzie di cualchi varietât, ma che al è mut te coinè: paie [áe], savaraio [áo], voie[óe].

Denant di r si dopre il diftonc ie impen di ia (tierç, vierzi ...). Se si gjave fûr une liste di ecezions - fiere, piere, Piere ... - al è pussibil scrivi ie e pronunziâ [jà].

12. Letare p, letare b

La letare p si cjatile in cualsisei posizion (pan, copasse, cuarp). Co si cjatile in fin di peraule, il plurâl si lu fâs – daûr de regule gjenerâl – zontant un -s, ancje tai câs dulà che la pronunzie plui comun e lasse fûr il sun p. Partant si scrivarà trops, ancje se si lei [tròs]; claps, ancje se si lei [clàs]...

La letare b si cjatile dome tal inizi e in cuarp di peraule (bon, barbe). A fasin ecezion lis peraulis che no son inmò adatadis al furlan, che a puedin vê il b ancje in fin di peraule: club, sub ...

Denant di p e b, il prefìs in- al devente im- (impen, imbocjâ...).

13. Letare t, letare d

La letare t si cjatile in cualsisei posizion (taront, martiel, mont). Co si cjatile in fin di peraule, il plurâl si lu fâs – daûr de regule gjenerâl – zontant un -s, ancje tai câs dulà che la pronunzie plui comun e lasse fûr il sun t. Partant si scrivarà pîts, ancje se si lei [pìis]... In gjenerâl, però, la pronunzie curade de coinè e evite la riduzion di [ts] in [s].

La letare d si cjatile dome tal inizi e in cuarp di peraule (dint, adun). Si cjate d in posizion finâl nome in cualchi particule gramaticâl che e je doprade denant di peraulis cuntune vocâl iniziâl: ad in doi, no ’nd àn ...; oben in cualchi peraule che no je inmò adatade al furlan: sud, kurd ...

14. Letare f, letare v

La letare f si cjatile in cualsisei posizion (fradi, infier, lôf). Co si cjatile in fin di peraule, il plurâl si lu fâs – daûr de regule gjenerâl – zontant un -s, ancje tai câs dulà che la pronunzie plui comun e lasse fûr il sun f. Par tant si scrivarà ûfs, ancje se si lei [ùus]; cjâfs, ancje se si lei [cjàas]...

La letare v si cjatile dome tal inizi e in cuarp di peraule (vin, love). Si cjate v in posizion finâl dome in cualchi peraule che no je inmò adatade al furlan, come moldâv...

Seont la coinè, tai diftoncs che a scomencin par u e tes peraulis che a tachin par u lunc (corispuindint al diftonc ou di altris varietâts) si dopre la forme cul v denant: vuaite, vuere, al vûl ...

15. La letare s

a) Par rindi il sun dal s che tes peraulis talianis si cjatilu in sapore, castità, fosso... (“s” sort) si dopre i segns ss fra vocâls e s tes altris posizions: fuesse, seneôs, pensadôr, mistîr ...

b) La letare s fra vocâls e rint il sun che tes peraulis talianis si cjatilu in asola, osare, isomorfo... (“s” sonôr). Par tant tal furlan si varà oselâ, esam, asin ... Dut câs, in cualchi peraule, il stes sun si à ancje daûr di une consonant: parsore... Se si cjatilu in principi di peraule, si segnilu metint un apostrof prin de s: ‘siminâ, ‘save, ‘suf ...

c) La Grafie uficiâl e lasse fûr de coinè il sun [Š] di peraulis tant che messedâ o vôs cundut che al è ben cognossût tal Friûl centrâl. Si lu pronunzie cence riprodusilu te grafie.

d) Ogni peraule e manten la grafie dal s iniziâl daûr dai prefìs o di chês altris peraulis te composizion: sunâ - risunâ; sintî - presintî; simetrie - asimetrie; viodi - viodisi ...

e) Il prefìs latin ad al devente as denant dal s iniziâl; ta chest câs, si manten la dople “s” te grafie: associâ.

16. Racomandazions su l’ûs di -mp finâl, di gn e di gl

Si racomande di fâ di mancul de grafie -mp finâl tes peraulis dulà che a son cognossudis lis pronunziis cuntun m sôl. Par tant si scrivarà om, impen di omp, esam, impen di esamp ...

In fin di peraule si racomande la grafie gn - e la relative pronunzie - cundut che si vebi ancje la pronunzie [jn]. Cussì si à di scrivi compagn, impen di compain; agns, impen di ains ...

Tal nes gl, lis dôs consonants si lein simpri distacadis, tant che tes peraulis talianis gloria, glucosio, glassa... ancje cuant che daspò la gl si cjate un i: glîr (ghiro).

17. I trê valôrs dal zete. L’ ûs di -ts

La letare zete e à trê valôrs:

1) Zone, organizâ, ziguzaine ... Ta chescj câs il zete al rint il sun che si cjatilu tes peraulis talianis zona, zebra, zaino ... Par solit, chest valôr al è carateristic des peraulis cultis e di cualchi peraule imprestade o espressive.

Si à di evitâ - te pronunzie curade de coinè - la riduzion di chest sun in esse (‘sone, organisâ ...)

2) Zovin, davuelzi, mezan ... Ta chescj câs il zete al rint il sun che si cjatilu tes peraulis talianis giovane, giaciglio, geloso ...

N.B. Tal sisteme grafic di Lamuela no si dopre mai la secuence ge o gi. Di fat, seont lis regulis di adatament des peraulis di varie divignince al furlan o si doprarà il segn z, che al rindarà il sun che o stin considerant ta chest pont (mieze, zirâ ...); oben si varà la relative palatalizazion, rindude cui digrams gje e gji (gjenerâl, imagjin ...).

3) Zucar, nazion, pronunzie ... In principi e in cuarp di peraule il zete al rint il sun che si cjatilu tes peraulis talianis zucchero, canzone, emozione ...

Ocjo! Co chest sun si cjatilu in fin di peraule, si scrivilu midiant dal digram ts, cussì si varà: adaments, fruts, fonts, cuietâts ...

18. L’ûs di ç, ce, ci

Il sun che si cjatilu tes peraulis talianis città, cento, pancia, ciuffo, cioccolato ... par furlan si rindilu doprant il ç - ci cu la cedilie - denant des letaris a, u, o (çate, çus, çondar) e in fin di peraule (mieç, bêç ...); denant di i e e, doprant - come tal talian - la letare c (cîl, cere ...).

Ocjo! Co une peraule e finìs par -ç, il plurâl si fasilu – daûr de regule gjenerâl - zontant un s (mieçs, bêçs ...) e pronunziant [ts].

19. Alterazions de pronunzie. Pierdite de lungjece te vocâl

Lis alterazions de pronunzie di une peraule tes diferentis posizions dal discors no si lis riflet te grafie. Cussì - par esempli - si scrivarà “cuant che tu vuelis”, ancje se te pronunzie e va pierdude la t finâl di “cuant” ...

Fûr che tai prefìs, l’acent dopli si mantegnilu te composizion e te enclisi, ancje se la vocâl no je plui lungje: preâlu, sêstu?, crodarâstu? ...  

20. L’ache (h)

Si dopre l’ache (h) tai digrams ch e gh; gjavâts fûr chei câs, si lu dopre dome in cualchi interiezion: ah, eh, oh ...

21. L’ûs dal apostrof. La particule indi

Si dopre l’apostrof:

1) Par scrivi l’articul determinatîf masculin singolâr tacât dal non o dal adietîf che i ven daûr: l’armâr, l’orghin, l’ustîr ...

Cheste forme dal articul no corispuint a une elision atuâl de vocâl dal articul, ma a che dal u dal articul antîc lu, aromai discomparît de coinè, se si gjave cualchi viere locuzion, come pa lu miei (per il meglio).

2) Par segnâ la elision dal i iniziâl de particule pronominâl indi daûr dal averbi no e dai pronons atons o, tu, a, e, mi, ti, i, si :

no ’nd àn, o ’ndi vevin, tu ’nt varessis, a ’nd àn, e ’nd à, mi ’nd à ... Come che si pues notâ, no si à mai l’apostrof daûr de d o de t, ancje se si piert l’i finâl.

Par tant lis formis grafichis de particule indi a son:

a - indi, ‘ndi

b - int, ‘nt (cul t audibil seont il contest e  il ritmi dal discors)

c - ind, ‘nd - dome denant di une vocâl, cul d pronunziât normalmentri

Cul imperatîf, il gjerundi e l’infinît indi al va in enclisi, al piert l’i iniziâl e finâl e al gambie d in t: Anìn a mangjânt un pôcs; damint une altre; fevelint prin di inrabiâti ...

3) In ducj chei altris câs, la elision de vocâl si le lasse ae pronunzie.

N.B. La Grafie uficiâl e esclût l’apostrof ancje in câs evidents di elision de vocâl te pronunzie, come tai articui determinatîfs e indeterminatîfs feminins singolârs la (la amie) e une (une altre); tai pronons atons (mi intrighe); tes formis contratis di ae (‘e - alla) e aes (‘es - alle); te preposizion di (di aur); tal pronon e coniunzion che (che al).

22. Formazions intune peraule sole

Lis formazions che a àn il valôr di elements gramaticâi si lis scrîf intune peraule sole in chescj câs:

a) I adietîfs e i pronons indefinîts (par es.: ancjetant, ancjetancj - altrettanto, altrettanti) componûts di doi elements (ancje + tant, ancje + tancj) cuant che il secont al à flession (tant - tante - tancj - tantis) e no il prin (ancje al reste simpri compagn). Ma dut cuant - ducj cuancj ...

b) I averbis che a son formâts di une preposizion plui un pronon indefinît, un averbi o il numerâl un, une: pardut, indenant,cuntun ...

I averbis che a rispuindin aes domandis par dulà?, di dulà?, dontri?, a vegnin daûr de preposizions par e di, che a son indipendentis.

c) I averbis che a son formâts di elements simii in sucession:  denantdaûr, sotsore ...

d) Cuant che lis peraulis a presentin alterazions de forme dai lôr elements: salacor, besvelt ...

e) Chestis formazions cu lis lôr variantis: adore, aduès, almancul, ancjemò, ancjetant, apont, benzà, bielzà, cemût, cetant, cundut, dabon, dassen, daurman, dibant, dibot, dutun, framieç, impen, insom, lafè, parcè, parom, pluitost, purnò, purpûr, pursì.

In plui cualchi altre co si varà il sens che e sei un element une vore unitari.

f) I averbis che a son ancje nons: doman, dopodimisdì, sotet ..

23. La liniute (-)

Si dopre la liniute:

a) Cuant che la composizion e je inabituâl, par esempli: coniunzion subietive-predicative...

b) Cuant che lis peraulis componudis a son formadis di doi tiermins espressîfs, par esempli: a spicigule-minigule...