Cjârs letôrs,

dopo une lungje e atente riflession, us comunichi che la esperience di Lenghe.net e finìs ca. E finìs, però, lassant une semence pal avignî.

Tal 2001 l’editôr, l’Istitût Ladin Furlan “Pre Checo Placerean”, al à metût sù il mensîl su cjarte “INT” cul so biel formât tabloid e la version bilengâl a spieli, di une bande dut par furlan, di chê altre dut par italian. Al jere un gjornâl zovin, fat in buine part di zovins, par pandi informazion furlane intune suaze europeane. Tal 2004 si decidè di lâ plui innà tal mont, in graziis di Internet: al nasseve www.lenghe.net, il portâl che di “INT” al tignì buine la redazion, la version bilengâl e un archivi siôr di materiâi e di documentazion, rignuvît te grafiche e tai contignûts sul imprin dal 2007.

Chest par contâus che lis nestris sieltis impuartantis a son stadis simpri fatis cun reson e cjalant tal cîl dal avignî, par cirî di vivi in maniere autentiche la nestre lenghe e la nestre culture intun mont che al à ben pôc a ce fâ cun chel dai nestris vons. Al è stât un deceni di bataiis e militance, che nus à viodûts tra i principâi atôrs tal puartâ indevant la informazion in marilenghe e sul Friûl, cuntun voli di rivuart ancje par chês altris esperiencis minoritariis. O crodìn di podê dî, cun sodisfazion, di vê savût lei la pagjine dal nestri timp. La stesse pagjine che vuê o vin sielzût di voltâ, par podê scrivi alc altri.

Prontâ cuntune cadence scuasit cuotidiane il servizi informatîf di Lenghe.net nol è stât facil e al à domandât un impegn grant e costant. Une impegn che vuê al è deventât impussibil puartâ indevant, no dome par un discors – che dut câs al va fat – di sostenibilitât finanziarie dopo dai pesants tais subîts an dopo an, ma massime pe mancjance di prospetivis par un setôr – chel de informazion par furlan – che tai ultins agns al è stât metût insomp, te liste des prioritâts, di bande des istituzions clamadis a puartâ indevant lis politichis di tutele.

Il nestri numarôs public di letôrs, dut câs, nol restarà a bocje sute: in curt o tornarìn in vore cuntune altre muse, une altre struture e altris obietîfs, simpri su Internet. Cui che al vûl tignîsi informât su chest cont che si iscrivi ae newsletter, se no lu à za fat.  

Sierant chest cumiât, il pinsîr al va ae tante int sparniçade pal Friûl, e soredut pal mont, che e vûl ancjemò ben a cheste lenghe, a cheste tiere. Vie par chescj agns o vin lavorât, tal nestri piçul, par semenâ e coltâ, cheste tiere: o sin sigûrs che lis semencis, timp o tart, a madressaran.

Mandi!

Anna Bogaro

Diretôr responsabil