In dîs agns “Alc&Cè” al à compagnât miârs di fruts ae scuvierte de marilenghe. Il gjornalut – suplement mensîl dal setemanâl “la Vita Cattolica” di sedis pagjinis, dutis a colôrs, cun intervistis, zûcs, pipins e tancj aprofondiments – al è nassût tal Novembar dal 1999 di une idee di William Cisilino e Andrea Venier. Si voleve fevelâ ai fruts di dut ce che ur podeve interessâ, tignint cont de realtât tor ator. Al è someât naturâl doprâ il furlan, la lenghe fevelade di cetancj frutins, cence dismenteâ chei che il furlan no lu san. Tal timp, “Alc&Cè” al è stât rignuvît un grum, sedi tai contignûts sedi te grafiche, frescje e siore di colôrs. Ma il spirt al è restât simpri chel. E di un biel pôc si lu cjate ancje su internet, sul sît da “la Vita Cattolica” (www.lavitacattolica.it), di dulà che si pues scjariâ in formât pdf, e ancje su Facebook. Un mût di stâ al pas cui timps e rivâ ai letôr plui zovins, plui sensibii aes gnovis tecnologjiis.

Sul gnûf numar di “Alc&Cè” si ricuarde il decenâl dal gjornalut e tal speciâl Andrea “Dree” Venier, autôr dai divertentissims Gnognosaurs, al conte cemût che al nas un fumet. Te rubriche Perlis di nature si fevele de inteligjence dai animâi e in Palaç cence segrets dal Comun cuntune interviste al sindic di Udin, Furio Honsell. Ambient in prin plan cun Barbe arbul al conte. Po a tornin Pantiagneur e Mario cu lis lôr aventuris a fumets; i zûcs, par divertîsi imparant la lenghe; l’util vocabolari par imagjinis.

Par sugjeriments e curiositâts sul gjornalut, si pues scrivi une e-mail a Erika Adami, responsabile e coordenadore editoriâl de riviste, ae direzion: adami@lavitacattolica.it.  

“Alc&Cè” al ven doprât ancje in tantis scuelis de regjon dulà che si insegne la lenghe furlane. I docents che a vuelin ricevilu pai lôr arlêfs, sore nuie, a puedin domandâlu telefonant al numar 0432/242611, mandant un fax al 0432/242600, o une e-mail ae direzion: amministrazione@lavitacattolica.it.