Regjiscj e produtôrs presints ae prime edizion de Mostre dal Cine a àn pandût il lôr entusiasim pe iniziative e le àn calcolade tant che une ocasion straordenarie pal cine des nazions europeanis cence stât e par stabilî une relazion seguitive tra autôrs e realtâts produtivis e distributivis ancje par fâ sintî di plui il lôr pês a nivel des istituzions europeanis.

I ospits a àn duncje domandât che la Mostre dal Cine di Udin e deventi un pont di riferiment permanent tra lis variis cinematografiis europeanis che si esprimin tes lenghis propris des nazions cence stât di mût di creâ une rêt che e meti in relazion lis variis realtâts produtivis.

A chest proposit i regjiscj e i produtôrs presints a Udin che a vignivin de Galizie, dal Paîs Basc, de Catalogne, de Ocitanie, dal Gales e de Bretagne, si son cjatâts dutun cui organizadôrs dal festival, par discuti su lis problematichis leadis ae produzion, al sostegn economic e la difusion dai lôr films. I ponts essenziâi di cheste discussion a vignaran intun secont timp butâts jù intun document. I protagoniscj di chest cine a domandin, tra l’altri, traviers di chest prin incuintri, une atenzion plui grande e un plui grant sostegn pal cine tes lenghis mancul pandudis de bande de union europeane e dai stâts europeans.

Il festival al sarà duncje un moment impuartant no dome par scuvierzi e preseâ films e autôrs di chest cine e un moment par fâlu cognossi a un public plui grant pussibil ma, in futûr, ancje par creâ, par mieç di chest apontament, la pussibilitât di meti adun coproduzions o dut câs colaborazions a nivel internazionâl.

Dut chest al varès di rapresentâ ancje une grande oportunitât pai cineascj e produtôrs furlans sei pes sinergjiis che a vignaressin fûr sei pes gnovis pussibilitâts economichis che salacor si podaressin verificâ. Ma al covente, par chest, che i protagoniscj di cjase nestre a fossin plui presints e plui atîfs a ingrampâ lis oportunitâts che a vegnin ufierts di chescj apontaments.

In ocasion dal festival al è ancje vignût fûr il numar 8 de riviste di cine Segnâi di lûs publicât dal CEC. Segnâi di lûs al vignarà ufiert a dutis lis bibliotechis de regjon e ai centris che si ocupin di cine, e si pues cjatâ li dal Visionario e li de sede dal CEC. La riviste e ten dentri articui e intervistis relatîfs a autôrs, cinematografiis e films programâts ae Mostre dal Cine di chest an, contribûts di Marcello De Stefano e Carlo Gaberscek, dongje di dutis lis informazions che a rivuardin iniziativis cinematografichis in regjon.