Il prin apontament al tacarà vinars ai 20 di Novembar a lis 20.30 te sede sociâl di Cjase Turoldo a Coder di Sedean e al sarà dedicât ae leteradure galese, une des plui antighis de Europe e ancje vuê, cun passe 400 libris publicâts ogni an, une vore vivarose. Protagonist dal incuintri – metût dongje in colaborazion cul “Wales Literature Exchange” e il “Wales Arts International” – al sarà un dai scritôrs galês plui innomenâts: Harri Pritchard Jones (te foto). Autôr di cuindis volums, voltâts in vot lenghis, fra contis, romançs, saçs di critiche leterarie e biografiis, Pritchard Jones al à partecipât ancje a lis protestis civîls e pacifichis pal ricognossiment dai dirits linguistics dal galês. President de Academie galese, al à curât pal editôr Mobydick la prime antologjie di narative galese in traduzion taliane, “Un mondo, il mondo” (2002) e il capolavôr de narative galese “Una notte di luna piena” di Caradog Prichard (2008).

A introdusi la figure e la opare di Pritchard Jones a saran i massims esperts a nivel talian di leteradure galese, Andrea Bianchi e Silvana Siviero. E moderarà la serade Anna Bogaro, docente e dotorande di ricercje in Siencis linguistichis e leterariis de Universitât dal Friûl.

Lis politichis linguistichis a saran invecit l’argoment dal secont incuintri di Puints, programât pai 27 di Novembar simpri a lis 20.30 in Cjase Turoldo. Vie pe serade al sarà presentât il libri “Lingue in bilico” di William Cisilino, a pene publicât te golaine “Lingue e Letterature” dal editôr Carocci di Rome. Il volum al propon un viaç te Europe des minorancis midiant di vot esemplis concrets di tutele. Si va dal progjet “Volontariât pe lenghe catalane”, al cine in lenghe furlane; dai plans di politiche linguistiche pal galês, ae promozion dal basc tes gnovis tecnologjiis; de emitente par talian de Slovenie Radio-TV Koper-Capodistria, al sisteme scolastic trilengâl dai ladins gardenês e badiots. In fin, a son descrits il model di protezion dal aranês e il particolâr sisteme di tutele des minorancis de provincie di Trent (cimbris, mochens e ladins fassans).

Ae presentazion a parteciparan, oltri al autôr, Aureli Argemì, president dal CIEMEN di Barcelone, Marco Viola, dirigjent dal Servizi minorancis linguistichis de Provincie autonome di Trent e Lorenzo Zanon, president de Agjenzie regjonâl pe lenghe furlane. L’incuintri al sarà ancje une ocasion par fâ il pont su la tutele des minorancis in Europe e par capî cualis che a saran lis gnovis sfidis che e varà di frontâ la lenghe furlane ta chest cercin.