“Si costituive cussi - al spieghe il storic Giancarlo Menis te sô "Storie dal Friûl"- un vast e compat teritori che al veve di sotstâ ae uniche jurisdizion feudâl dal Patriarcje. Intune peraule al vignive fondât chel "principatus Italiae et Imperii", politic-eclesiastic, che al sancive une realtât social za consolidade mediant di un lunc procès storic e che, di lì indevant, par trê secui e mieç, e varês unît, i furlans in formis simpri plui elevadis di vite-civîl”.

Tai agns a vignî si sarès zontât al Patriarcje un altri podê, il Parlament de Patrie, dulâ che a sintavin il clero, i nobii e i rapresentants dai comuns. Za tal XIV secul il Parlament al jere deventât la massime assemblee legjislative, il maiôr tribunâl dì apel e aministratîf, rivant a controlâ il stes Patriarcje. Par chest so grant significât, il 3 di Avrîl al rapresente ancje in dì di vuê un moment impuartant pe comunitât furlane, une vere fieste nazionâl par memoreâ e ripensâ in clâf moderne lis formis di autoguvier e rapresentativitât che par cetancj secui a àn caraterizât la Patrie dal Friûl.