Come ogni Istât, prime dal inizi de gnove stagjon de serie A, lis scuadris di balon a presentin lis lôr mais, par solit un grum rignuvidis a pet dal an prin. Cussì ancje l’Udin: un svant par il Friûl intîr, une scuadre che e rapresente dute la Patrie e che tal campionât 2008/2009 e zuiarà la stagjon numar 14 di file in A.

Tal ritîr di Sapade ae metât di Lui, in ocasion de presentazion de gnove maie blancje e nere – fin chi nuie di strani! – la sorprese: juste tal mieç sul pet dai zuiadôrs si cjate une acuile blancje su sfont blâf. Benon, ise forsit chê dal Patriarcjât? Mai plui! E je la acuile de Regjon Friûl-Vignesie Julie, il steme creât tal 1964 che al mostre une acuile (che e rapresente Rome) che e grampe une tor (che e rapresente Aquilee). Par profondî la cuistion si rimande ae interessante spiegazion di Maurizio Buora (te foto la vere acuile furlane: chê di Bertrant). 

Parcè cheste sielte? Il president dal Udin Franco Soldati al à dit che la scuadre e rapresente no dome il Friûl ma dute la regjon, pa la cuâl si scugnive meti su la maie chel simbul. Cun di plui, Soldati al à ringraziât il president de Regjon Tondo che al à cjatât un acuardi cui parons dal Udin, la famee Pozzo, par fâ comparî chel steme su lis maiutis. Al à pandût la sô sodisfazion ancje l’assessôr regjonâl al Sport Elio De Anna, che al à dit che la scuadre e varà di fâ di testemoni dai valôrs des ints dal Friûl-Vignesie Julie vie pe Italie e in Europe cu la acuile de Regjon sul pet. Par altri, chest simbul al comparìs bielzà su lis canotieris pre-partide de Snaidero basket; adiriture la scuadre di hockey di Puntebe e fâs di non “Acuilis”.

Duncje, tacant dal ultin fin setemane di Avost inte serie A e di metât Setembar in Cope Uefa, la scuadre furlane e vistirà la gnove maie dal sponsor tecnic, la dite venite Lotto, che e à prontât altris dôs divisis pai zuiadôrs: une colôr cjarte di zucar, un’altre zale (tipo chê dal Chievo). Su chestis dôs mais la acuile e je plui grande e e je metude sul flanc çamp, colôr aur su chê cjarte di zucar, blu su chê zale. La maie storiche, chê cui colôrs citadins blanc e neri, no à cjatât bon acet di bande dai tifôs. E la cuestion de acuile “no furlane” no je la uniche: lis strichis a son une vore sutilis tant che la divise e pâr jessi chê dal Ascoli. Diviers tifôs a fevelin di tirâ sù firmis tant che ultin tentatîf par convinci i dirigjents de societât a cambiâ idee, ma al sarà dificil. Al è ancje cui che al dîs che nol comprarà la maiute 2008/2009, cualchidun parfin nol vûl fâ l’abonament pal stadi par dâi cuintri a cheste sielte.

Viodarin cemût che si metaran lis robis di ca ae fin di Avost: si riscje pardabon di pierdi une altre buine ocasion par fâ cognossi vie pal mont il Friûl, e no sarès la prime…