Publicât de associazion culturâl "Achille Tellini" di Manzan "Il sium, il viaç, la bataie - Il miluç de magne" di Alessandro Carrozzo al rapresente un dai prins e dai plui interessants studis aprofondîts di antropologjie culturâl par furlan. Il volum al ripuarte dôs ricercjis: une sui benandants e chê altre su la figure mitologjiche de magne.


Carrozzo al tache la sô analisi partint dai documents che Ginzburg al veve stazât pai siei lavôrs sul fenomen dal benandantisim e si ferme soredut sui aspiets simbolics (il sac amniotic tant che obiet vignût di chel altri mont, la jessude animiche dal cuarp) e su la lôr valence metafisiche. Pal l'autôr il nassi cun ciertis particolaritâts (cu la "cjamese") al conferìs un complès di podês sorenaturâi ma che a puedin jessi doprâts daûr de "inclinazion di ognidun". E duncje, o varìn il benandant, se chest al è puartât a fâ il ben o il malandant (strion) se chest al è pitost puartât a fâ il mâl.


Come che al veve za stazât Ginzburg, Carrozzo al scuarç la relazion tra il siamanisim "siberian" e la specifiche realtât dal benandantisim. Fasint un excursus a tacâ des "crodincis" za presintis tes comunitâts dal paleolitic superiôr (cirche 40.000 agns indaûr) fin ae mitologjie de etât classiche greghe e romane, l'autôr al met in lûs une continuitât di significazions, di simbui, che si tramandin, in formis diferentis, tal spazi e tal timp. Ma, di chê strade, al conteste tant che debule la ipotesi di un centri di iradiament ugnul e identificabil, metint in lûs la complessitât dai apuarts, des influencis e des interazions culturâls e cultuâls tra i popui vie pai secui. "Ginzburg" al scrîf Carrozzo " al somee colâ intune des tentazions plui pericolosis pai storics, chê di volê par fuarce individuâ il lûc e il moment precîs de nassite di une dinamiche, cuant che in efiets dute la storie no si disvoluce mai in sens liniâr, ma simpri intun complès pastôs e viscôs di lungjis trasformazions.".
Tal stes mût, al conteste la ipotesi di Gilbert Pressac, li che il grant studiôs furlan al teorizave un rapuart tra i insiums estatics dai benandants cun  cierts rituâi eterodòs che la Incuisizion e veve scuviert e condanât tal 600 te comunitât di Palaçûl. Un rît che al consisteve tal lâ in procession lustrant la vile, la gnot di Sabide di Pentecostis, "cjantant a dôs vôs une cjançon che e tacave, (...), cu lis peraulis "scjaraçule maraçule"".


Pressac al rivarà a identificâ in chescj rituâi un vanzum des pratichis di une antighe comunitât cristiane di Alessandrie di Egjit, i Terapeutis. e chestis pratichis cui insiums estatics dai benandants. Ma lis diferencis tra i doi fenomens a son masse grancj, al contint Carrozzo, par podê viodi un leam. Tra lis incompatibilitâts l'autôr al cite la diference sostanziâl tra la pratiche dai benandants che e jere segrete e chê scuvierte a Palaçûl che e jere palese; il fat che il tiermin benandant nol ven mai doprât te acuse cuintri chescj contadins dal 600; il cjant, cun di plui, no si presente mai te realtât dai benandants; e no je coripondence temporâl tra i rituâi pentecostâi dai contadins di Palaçûl e lis cuatri timporis dai benandants.
Un cjapitul al è daspò dedicât ae presince de figure dal benandant te leterature furlane. A chest proposit a son citâts autôrs tant che Pauli Diacun, G.B. Donato, Ermes di Colorêt, Pieri Çorut, Toni Broili, Pacifico Simoncelli e une conte di Elena Fabbris Bellavitis.


La seconde part, plui sclagne come numar di pagjinis ma no mancul interessante, e je dute dedicade al significât di une figure mitiche de tradizion popolâr furlane: la magne e so miluç. Su chest cantin Carrozzo al emet une ipotesi: "Cirint di cjalâ il mît te prospetive druidiche, se mai al è pussibil daspò di vincj secui, si pues meti la ipotesi che il tesaur di cuistâ tal mont nereôs dal misteri (chel des magnis) al puedi jessi la cognossince finâl de fuarce cosmiche, dal segret ultin de vite e de muart (sot dal simbul dal ûf o dal miluç o de bale di aur), la rispueste ae prime e ae ultime domande".
Il volum al coste 5 € e si lu cjate ancje te librarie di vie Piave a Udin.