Si fevelarà dal miôr des politichis linguistichis tal secont apontament de rassegne Puints vinars ai 27 di Novembar a lis 20.30 in Cjase Turoldo, midiant da la presentazion dal libri “Lingue in bilico. Buone pratiche nella tutela delle minoranze linguistiche in Europa” di William Cisilino (te foto), a pene publicât te golaine “Lingue e Letterature” dal editôr Carocci di Rome. Il volum al propon un viaç te Europe des minorancis midiant di vot esemplis concrets di tutele. Si va dal progjet “Volontariât pe lenghe catalane”, al cine in lenghe furlane; dai plans di politiche linguistiche pal galês, ae promozion dal basc tes gnovis tecnologjiis; de emitente par talian de Slovenie Radio-TV Koper-Capodistria, al sisteme scolastic trilengâl dai ladins gardenês e badiots. In fin, a son descrits il model di protezion dal aranês e il particolâr sisteme di tutele des minorancis de provincie di Trent (cimbris, mochens e ladins fassans).

Ae presentazion a parteciparan, oltri al autôr, Aureli Argemì, president dal CIEMEN di Barcelone, Marco Viola, dirigjent dal Servizi minorancis linguistichis de Provincie autonome di Trent e Lorenzo Zanon, president de Agjenzie regjonâl pe lenghe furlane. L’incuintri al sarà ancje une ocasion par fâ il pont su la tutele des minorancis in Europe e par capî cualis che a saran lis gnovis sfidis che e varà di frontâ la lenghe furlane ta chest cercin.