Creâ une rêt jenfri lis minorancis linguistichis par judâsi insieme cuintri dal scurtament dai finanziaments statâi e cjapâ dentri ancje la minorance Rom e Sinta jenfri chês tuteladis de leç 482/99: a son lis propuestis plui impuartantis buridis fûr de Conference regjonâl de lenghe sarde. Lis trê zornadis a Macomer sul teme de diviersitât linguistiche in Europe, Italie e Sardegne a son stadis promovudis dal Assessorât regjonâl de Istruzion Publiche par fâ il pont su la situazion de lenghe minoritarie. La prime propueste che si è rivade a meti in pîts e jê chê di fâ une rêt des minorancis linguistichis talianis in maniere di condividi un plan comun denant dal Guvier, che al à scurtât i fonts a disposizion di dîs a doi milions di euros; scambiâ esemplis e modalitâts di pratichis buinis; condividi contignûts, imprescj didatics e v.i. La seconde e je peade al Ordin dal dì, proponût di Eva Rizzin, sul probleme dal ricognossiment mancjât, in Italie, de minorance linguistiche Rom e Sinta, che no je dentri tal elenc des minorancis linguistichis protetis de leç cuadri 482/1999, e su lis discriminazions pe partignince etniche une vore penzis che ogni dì Rom e Sinti sedi talians che forescj, a àn di patî.

L'Ordin dal dì, firmât dal assessôr regjonâl Maria Antonietta Mongiu, presidente de Conference, e di ducj i partecipants, al denunzie lis violazions dal Guvier talian cun dut chei che a son invezit i oblics cjapâts sedi a nivel nazionâl che internazionâl; al impegne chei che lu àn firmât ae sensibilizazion publiche in materie di discriminazion, a meti adun ocasions di incuintri cun zovins rom e sinti, a fâ informazion e a ufrî formazion tes scuelis e a realizâ campagnis antidiscriminatoriis in coerence cui principis gjenerâi che a movin la cuestion de difese des minorancis linguistichis storichis.

Tai trê dîs e je vignude fûr cun di plui cheste situazion sociolinguistiche in Sardegne: il sart al ven fevelât di scuasit il 70% de popolazion cuintri di un piçul 10% di fruts marilenghe, concentrât par altri ta areis ben precisis: Gocean centrâl, alte Barbagje e Baronie. A son lis areis urbanis e chês des cuestis li che nol è nissun passaç intergjenerazionâl, e pe plui part par cuestion sociâls. Altris dâts interessants a son stâts presentâts sul stât di salût dal galurês e dal tabarchin, che al è vignût fûr che a gjoldin di un benstâ che nol è tant mâl, mentri a samein in crisi il catalan e il sassarês. Si à tornât a marcâ la oportunitât di une gnove leç in materie di politiche linguistiche, cussì cemût che al è bielzà sucedût tal Plan Trienâl de Lenghe, che e inzorni i contignûts de LR n. 26 dopo che a son passâts undis agns.

(foto giosabba)