I personaçs imagjinaris e i animâi fantastics des leiendis furlanis a tornin a vivi cul spetacul “Striis e striaments tal Friûl di Mieç”, in sene vinars ai 30 di Novembar, aes 20.30, a Coder di Sedean. Teatri dal event il cjast de cjase di pari David Maria Turoldo.

L’incuintri si insuaze te rassegne “Puints” che, rivade ae seste edizion, e promôf cun incuintris, aprofondiments e spetacui la lenghe, la identitât e la autonomie furlane cuntune vualmade che e passe vulintîr i confins regjonâi par cirî altris esperiencis culturâls. Vie pai agns a “Puints” si à fevelât di leterature, di popui e minorancis, di viaçs ae ricercje di altris identitâts, di insegnament plurilengâl, di dirits lenghistics, di autonomisim, di progjets pal Friûl di doman.

La manifestazion e je inmaneade dal Istitût Ladin Furlan “Pre Checo Placerean” e dal portâl de lenghe furlane www.lenghe.net, cul jutori de Regjon.

“Vie pe serade - al spieghe il president dal Istitût, William Cisilino - cun leturis senichis, cjants e musichis dal vîf, si podarà jentrâ dentri tal univiers di rîts, usancis e mîts de civiltât agrarie furlane”. Protagonist un libri di publicazion resinte par cure di Guido Sut e Fausto Zof: “Friûl di Mieç. Miti, fiabe e leggende del Friuli storico”, editât di Chiandetti e promovût dal Istitût “Tellini. “Il test - al va indevant Cisilino - al è cetant impuartant stant che al met adun plui di tresinte storiis (par furlan e talian), e al è il risultât di intervistis fatis a la popolazion di tredis comuns dal Friûl di Mieç.

Aes fotos e ai disens di pitôrs dal puest, si alternin lis testemoneancis di personis in là cui agns che a àn tignût a ments la memorie dai rîts peâts a la anade agrarie, jenfri fûcs epifanics, benedizions, preieris, animâi fantastics e personaçs imagjinaris tant che lis aganis”.

Il spetacul al vignarà presentât di Lorenzo Zanon, Assessôr ae culture dal Comun di Sedean, e di Luigi Geromet, president dal Istitût “Achille Tellini”.

In sene, a lei bocons des storiis misteriosis e ferbintis dal Friûl di une volte, Doris D'Antoni, Giulia e Fiorella Di Benedetto, Loreta Zuccolo, Viviana Tosolini, Cinzia Sut, Silvia Zamparo e Giuseppe Morellato.

Curadôr dal spetacul Fausto Zof, cu la regjie di Guido Sut e lis musichis di Giulio Gallo.

Vinars ai 7 di Dicembar al sarà il secont apontament di “Puints” che al metarà adun esperts internazionâi in materie di lenghis minoritariis par pandi il lôr pont di viste su la gnove leç regjonâl pe tutele de lenghe furlane. Lûc e orari a restin simpri chei.

(La ilustrazion ca in bande e je di Luisa Tomasetig)