E je stade anunziade la seconde edizion dal concors cinematografic "Corto a Muris" che si davuelzarà, te suaze de edizion 2008 di "Muris in Festa" te frazion dal comun di Ruvigne. Il festival al à chel di promovi la produzion cinematografiche amatoriâl locâl sei documentaristiche sei di finzion. Il teme al è libar ma lis ripresis a àn di jessi fatis dentri dai teritoris de Comunitât colinâr dal Friûl (Buie, Colorêt di Moltalban, Cosean, Dignan, Feagne, Flaiban, Forgjarie, Maian, Moruç, Osôf, Ruvigne, Rivis d'Arcjan, Sant Denêl, Sant Vît di Feagne e Trep Grant). I films a puedin jessi par talian o par furlan e a àn di durâ massime dîs minûts. La premiazion si fasarà parentri de manifestazion "Muris in Festa" che si davuelzarà dai 5 ai 7 di Setembar e dai 12 ai 14 di Setembar dal 2008.

E sarès stade la prime rapresentante de minorance taliane che e vîf in Slovenie e in Crauazie a cjatâ puest te Cjamare dai deputâts a Rome. E invecit Maria Grazia Frank di Flum/Rijeka/Fiume, candidade dal Udc te circoscrizion Europe par ocupâ un dai dodis seçs risiervâts ai deputâts elets tal forest a Montecitori, e à mancjât l’obietîf tirant dongje in dut 912 vôts, no avonde par sigurâi il puest. La Frank e à dut câs ringraciât pe poie i talians di Slovenie e Crauazie, tornant a dî che la minorance e à dirit di vê un so rapresentant in Parlament a Rome. Al puest de Frank al larà te Cjamare Aldo Di Biagio (te foto) dal Popul de libertât.

Il servizi di informazion dal Comun di Tavagnà si insiore di un imprest gnûf: “Il Sfuei di Tavagnà” (te foto la cuvierte), insert di 4 pagjinis dut par furlan.

Come che si lei tal editoriâl dal sindic Mario Pezzetta, "Il SFUEI di TAVAGNÀ al è un imprest informatîf in lenghe furlane volût de Aministrazion comunâl in aplicazion de leç 482/99, che lu finanzie. La publiche aministrazion e tocje ogni dì la vite dai citadins. Ogni persone, in maniere plui o mancul direte, e à a ce fâ cui servizis publics e in particolâr cui uficis dal Comun. La publiche aministrazion e rapresente un ambit essenziâl dulà che lis lenghis minoritariis, tal nestri câs la lenghe furlane, a varessin di cjatâ espression plene. Tutelant l’ûs di cheste lenghe in ambit public si impedìs che e ledi al mancul. Ancje la Europe e dîs che la presince des lenghis minoritariis tai servizis publics e costituìs par chestis lenghis un fatôr impuartant di legjitimazion pai rispetîfs locutôrs.