La storie
Cu lis sôs frazions, al è logât, tant che Cjasteons di Strade e Gonârs, dilunc de "Stradalte", une strade antighe che e coreve "disore" des risultivis. I fats de alte Ete di Mieç si ju cognòs pôc; ma si sa che, sicu altris paîs di cheste zone, Talmassons al jere sot dal domini dai Patriarcjis di Aquilee; i Patriarcjis lu infeudarin ai Conts di Gurize, che a atuavin la lôr jurisdizion a traviers di un "cjastalt".
Te storie dal Comun e à vût une impuartance grandone la Plêf di Sante Marie di Flambri, une des plui antighis dal Patriarcjât: la "Plebs Flambri" e je nomenade la prime volte intun document dal 1126; il "plebanus", ven a stâi il plevan, lu presentavin al Patriarcje i Conts di Gurize; tal 1497 al subjentrà ai Conts l'imperadôr de Austrie Massimilian.
Daspò dal an 1500 si ve plusôrs vuerutis, massime pai intervents ta chest teritori de bande de Republiche di Vignesie; cheste, che e veve otignût la contee di Belgrât, si imparonâ di une vaste zone, che e veve dentri ancje Talmassons e Flambri. La Republiche di Sant Marc e infeudà di chescj paîs la famee dai Savorgnans. Si tornà a fâ sù ta chei agns la curtine difensive, che i udinês a vevin sdrumade intant di une scorsade tal 1346. Intant des invasions teribilis dai turcs (dal 1477 al finî di chel secul), al fo sdrumât il paisut di Sant Antoni, che al jere a misdì di Talmassons: e restà sù dome la glesie; la int di chê viluce e le a parâsi intes curtinis di Flambri e di Listize.
Dal secul XVII indenant la storie di Talmassons e concidè cun chê dal Friûl centri-ocidentâl dut intîr.
Il paîs al è ancje in vuê un centri agricul, ma intai decenis plui resints dilunc de strade statâl 252, la "Napoleoniche", a son nassudis cetantis ativitâts artesanâls e industriâls, massime cu la lavorazion dal len. Intai nestris agns, Talmassons al à uns 4500 abitants.

Il non
Talmassons al è un dai toponims furlans plui impuartants jenfri di chei che si à doprâts tantche sole forme uficiâl, cence proponi mai une traduzion in italian (cussì ancje Nimis, Faedis, Grions, Montenârs, Gonârs, Sequals). Chest non si lu cjate scrit la prime volte intun document dal 1174, cu lis peraulis "usque ad Talmasones". I esperts a àn fat plusôrs ipotesis su la divignince di chest non: al podarès jessi un "prediâl", vignût di un "Talmasius", oben une derivazion di "mansio", la cjase di campagne, cul prefìs "tal", il furlan par "in"; ma al è un fat che la vôs "Talm" si le cjate, si disarès, dome in Friûl e in Romanie: in Friûl po o vin une mont clamade "Talm" e doi paîs di là de Aghe, che si clamin "Talmasson". Flambri (la prime citazion e je dal 1101) al à vût il so non di chel di un gjermanic, "Flamprath". Flumignan (scrit intes cjartis tal 1256) al è un "prediâl" rivât di un "Flaminius", un om roman, si crôt un soldât. Sant Andrât si pense che e sedi une forme cuntune influence slave sul non di Sant Andree.

I talmassonês innomenâts
Jenfri lis personis oriundis di chest Comu, a mertin dal sigûr une citazion, magaricussinò curte, almancul chestis: Pacific Valussi (1813-1893), inzegnîr, deputât, economist, gjornalist; Eugjeni Carli Valussi (1837-1903), sacerdot, deputât a Viene, elet a Gurize, dal 1873 al 1886, po Vescul di Triest dal 1886 a la muart; Nadâl Turco (1889-1927), publicist, sociolic, docent di filosofie; Pauli Fortunati (1906-1980), docent universitari, senadôr, president de Societât italiane di Statistiche; Corneli Fabro (1911-1995), sacerdot, teolic, delegât italian inte Comission de UNESCO che e veve l'assum di scrivi la "Declarazion dai dirits dal om"; Vergjili Gamboso (n.tal 1930), sacerdot, autôr di studis preseâts sore Sant Francesc di Assisi e Sant Antoni di Padue.