Vuê a son simpri di plui chei che no àn altri sisteme, par fâsi cjacarâ intor, che lâ a scuindisi (si fâs par mût di dî) intune isule. La television nus mostre in continuazion barufis, plui di cualchi maleperaule e une vore di insolencis che si scaraventin -un cuintri l'altri- personaçs dal spetacul. Proprit chei che, fin a cualchi timp indâur, a jemplavin lis pagjinis dai cuotidians cu lis gnovis su lis lôr ativitâts. Sedi te musiche, sedi tal teatri o te art in gjenerâl.

A son ancje ca di nô, tal nestri Friûl, di chei a àn vût il lôr moment di glorie e che daspò di chê volte no son plui stât bogns di vê il ferâl pontât te muse. Forsit un di chescj sojo ancje jo? No savarès. Par sigûr però no mi pensarès mai di lâ te isule dai innomenâts.

Robe che invezit al sarès verementri pussibil di pensâle, par plui di cualchi non furlan (che chi no fasarai), che al à fat politiche, musiche o che al à scrit su cualchi gjornâl. Ve chi la soluzion: ducj a Grau, a fevrâr... cuant che li nol è nissun. Lontans di nô, e nô a votâju cussì: “Tu jeris innomenât e cumò tu ses stat nomenât!”.