Il stropon che al cope e la bluse che ti salve la vite.
Ogni an doimil talians a son "vitimis" dal tapon dal spumant o dal champagne, massime chei colpîts prime dal prindis dal ultin dal an.
A son une vore i intervents ai vôi par vie des feridis ripuartadis di chei che a son dongje dal "sassin" (chel che al vierç la butilie), cuant che al sclope. Al samee che il prin de storie svuarbât di un tapon un al fo propit Dom Perignon, l'inventôr dal champagne.
E la probabilitât di sei cjapâts di smicje no je propit cussì piçule tant che si podarès imagjinâ: i babios a àn calcolât che un tapon di champagne al sta mancul di un bati di cei (par sei precîs 0,05 seconts), par colpî. Robis che a no sucedin mai cuntune butilie di bon merlot o tocai dal nestri Collio.
Simpri fevelant di colps insospetabii o ai let che une femine impresarie dal Brasîl e je scjampade di un biel pericul graziis a lis sôs tetis al silicon, cuant che un lari al à provât a trai doi colps di revolvar. La "gome" e à fermât lis balis.
La femine, cumò, e à dopleât la misure dal silicon.
Une biele scuse par aumentâ il so sen, ma un esempli che lis nestris bielecis dal Friûl no àn bisugne di copiâ: lôr a àn un metodi plui naturâl, parcè che di simpri a doprin il tradizionâl custum furlan, che al jude a fânus gjoldi une biele viodude.