La cjase, cantin cjâr ai furlans, al è un lûc plen di significâts emotîfs, afetîfs e sociâi: ambient di vite, li che il frut al sperimente lis primis formis di relazion, al vîf il rapuart fondamentâl cui gjenitôrs e i fradis, al  fronte i prins conflits. La Direzion didatiche di Aquilee e il dirigjent scolastic, Laurin Zuan Nardin, i insegnants e i arlêfs e la Cooperative Damatrà a àn presentât il libri Claps, risulte des peraulis, des imagjinis e dai pinsîrs dai fruts vignûts fûr intant dal laboratori che al à cjapât dentri lis scuelis de infanzie e lis primariis dai comuns di Aquilee, Flumisel, Tierç e Vile, intal progjet pe promozion de lenghe e de culture furlane “La cjase: il lûc, la famee, lis storiis, lis peraulis che la contin”.

Il progjet al è stât promovût dal Circul didatic di Aquilee, cul contribût de Regjon FVG, e de Cooperative Damatrà, che di agns e je impegnade inte ricercje creative pai fruts; al è stât fat tal an scolastic 2008-09 e al à sierât un percors che al veve soredut chê di discuvierzi la culture e la lenghe furlanis.

Midiant de esplorazion e de riflession sul cuotidian, la assunzion di segnis, simbui e valôrs de tradizion, inte sugjestive scuare de “cjase Tarlao”, i fruts a son stâts coinvolts intune narazion vivarose par rivâ adore a cjalâ ancje i mûrs, lis stradis, i portons o lis scjalinadis dal lôr paîs tant che “veicui” di storiis di contâ. Dopo, a scuele, tacant dai claps, prin materiâl di costruzion des cjasis, dopo vê esplorât e tocjât, a àn fat sù, tant che muradôrs, lis lôr piçulis cjasis, plenis di contis, di storiis vecjis e gnovis.

Come che e dîs la mestre Silva Ustulin: “ No si rispiete un lûc, un teritori, cence cognossilu e amâlu”.