Dut al è scomençât tal 2005 cuant che si à inviât il progjet clamât “Poeti e scrittori nelle Terre di Mezzo”: siet grancj autôrs de leterature, che a son stâts a stâ tal teritori che al cor de culine fin jù ae basse furlane (Elio Bartolini - te foto, Ermes di Colloredo, Amedeo Giacomini, Sergio Maldini, Ippolito Nievo, Pier Paolo Pasolini e David Maria Turoldo ) e siet Comuns che a son peâts a chescj scritôrs (Cjamin di Codroip, Cjasarse, Codroip, Colorêt di Montalban, Cordovât, Sedean e Vil di Var).

Al è di chi che, di une idee di Davide Lorigliola, al ven fûr il Festival Regionale del racconto rivât ae sô seconde edizion. Un Festival che al propon un program siôr dai 4 ai 7 di Setembar e che al à dutis lis cjartis a puest par tornâ a vê il sucès dal an passât.

I prins promotôrs di chestis tieris plenis di storie, art e culture a son stâts propit chescj grancj leterâts che cu lis lôr pagjinis a ‘nd àn piturât la bielece e i aspiets carateristics. Un progjet che al met dongje elements culturâi e turistics tal stes timp parcè che al fâs cognossi borcs, glesiutis, mulins, vilis e prodots cuntun Festival che al zire une dopo chê altre lis pagjinis di chescj lûcs.

Za di un pôc in ca il president de Regjon Friûl-V.J., Renzo Tondo (te foto), al veve mandât segnâi une vore clârs di vierzidure su la cuistion de lenghe furlane. Cumò, però, dopo des declarazions pandudis al Corriere della Sera sul cont de regjonalizazion de scuele, si pues fevelâ di une vere svolte. Tondo, di fat, al à declarât testualmentri che “noi siamo una regione di confine, il friulano è una lingua riconosciuta dalla Costituzione e insegnata nelle scuole. Non sarebbe male definire una quota di insegnanti madrelingua, per salvaguardare questo nostro patrimonio”.

La afermazion di Tondo no je di pôc parcè che e va adiriture al di là de stesse leç regjonâl 29/07 che e previôt dome un elenc dai insegnants di marilenghe e no une classe di concors di pueste o une riserve di puescj dentri des classis za in vore (come che a àn, par esempli, i insegnants di sloven). Sul plan politic la “cuote” di insegnants furlanofons e vûl dî almancul altris dôs robis: la volontât di lâ indevant a garantî l’insegnament dal furlan e ancje la necessitât di difindi cui dincj lis competencis in teme di marilenghe metudis in dubi dal ricors ae Cort costituzionâl.

Per profondî la gnove us segnalìn, fra i altris, il blog di Christian Romanini e chel dal Comitât 482.

Une television su la rêt internet e sul digjitâl in lenghe sarde, l’Atlant linguistic di ducj i dialets de Sardegne e il consolidament de sperimentazion des normis di riferiment pe lenghe scrite par ducj i ats burîts fûr de Regjon. A son trê i obietîfs che a marchin fuart il Plan trienâl de lenghe sarde fat bon de Zonte Regjonâl de Sardegne.
Confronts, dibatiments, cunvignis e scandais dai ultins agns a àn marcât, ancje daûr des novitâts puartadis de leç 482/99, la oportunitât di meti a bon i imprescj normatîfs corints. Chescj ultins di fat, se a smirin dome ae valorizazion culturâl e ae difese dal patrimoni imateriâl dialetologjic, stant a la Zonte no fasin vignî fûr la specificitât dai problemis di rivitalizazion e di planificazion linguistiche. Ta cheste direzion il Plan al à un rûl di fonde te transizion viers la adozion di imprescj normatîfs gnûfs e plui adats.

Cheste setemane, sul gnûf numar dal cuindisinâl in marilenghe Il Diari, si cjate fra lis altris un speciâl sui blog par furlan. L’articul al fevele ancje de ultime novitât de rêt: Macôr l’agregatôr (te foto il singolâr “testimonial” dal sît), l’imprest par tignî sot voli l’ultin blogarin che al à inzornât il sô diari on line.

Par savê cuâi che a son i blogs in marilenghe o podês ancje “sgarfâ” intai leams di Lenghe.net.

 

Come ogni Istât, prime dal inizi de gnove stagjon de serie A, lis scuadris di balon a presentin lis lôr mais, par solit un grum rignuvidis a pet dal an prin. Cussì ancje l’Udin: un svant par il Friûl intîr, une scuadre che e rapresente dute la Patrie e che tal campionât 2008/2009 e zuiarà la stagjon numar 14 di file in A.

Tal ritîr di Sapade ae metât di Lui, in ocasion de presentazion de gnove maie blancje e nere – fin chi nuie di strani! – la sorprese: juste tal mieç sul pet dai zuiadôrs si cjate une acuile blancje su sfont blâf. Benon, ise forsit chê dal Patriarcjât? Mai plui! E je la acuile de Regjon Friûl-Vignesie Julie, il steme creât tal 1964 che al mostre une acuile (che e rapresente Rome) che e grampe une tor (che e rapresente Aquilee). Par profondî la cuistion si rimande ae interessante spiegazion di Maurizio Buora (te foto la vere acuile furlane: chê di Bertrant).