Lenghe.net - Il portale della lingua friulana - Il portâl de Lenghe Furlane

Su Lenghe.net i apontaments culturâi dal mês

Apontaments

lei »

Ipse Dixit

Antonio Musnig

“I cittadini di Gorizia parlano tre lingue: sloveno, tedesco e friulano. Il tedesco lo si ...

lei»

Intai Paîs

VENçON

La storie
Vençon al vè vie pai secui, e ancje tai decenis resints, une storie ...

lei»

Ostarie dal peteç

SI PUEDIAL VÊ UNE FEMINE PLUI INSIMINIDE DI CUSSÌ?

Chê altre dì o jeri in machine cu la mê femine e – folchetitrai – ...

lei»

FÂ INFORMAZION IN LENGHE LADINE

L’EDITORIÂL DI “LADINS DAL FRIÛL” DEDICÂT AL SEMINARI DI GJORNALISIM

O ripuartìn daûr vie l’editoriâl dal ultin numar di “Ladins dal Friûl” a firme dal diretôr Renzo Balzan, dedicât al seminari di gjornalisim metût adun de Provincie di Trent, in colaborazion cul Istitût Ladin Furlan “Pre Checo Placerean”, intal mês di Mai stât (te foto, Uinsionn mac Dubhghaill).

Il periodic, dongje di leilu te forme stampade, si pues cjatâlu ancje su Internet tal sît www.ladinsdalfriul.eu.

Dai 15 ai 17 di Mai stât a Poza di Fasse si è davuelt il IV “Seminari dai gjornaliscj ladins” inmaneât par cure la Servizi pe promozion des minorancis linguistichis de Provincie autonome di Trent. A jerin naturalmentri presints i gjornaliscj dai media ladins dolomitans, de Svuizare rumance e de Furlanie. Dal Friûl a jerin rivâts sù uns dîs gjornaliscj in rapresentance des testadis: “La Patrie dal Friûl”, “Ladins dal Friûl”, “La Vite Catoliche”, “Radio Onde Furlane”, “Radio Spazio 103”, “www.lenghe.net” e de Rai regjonâl.

al va indenant»

LA SLOVENIE SI REGJONALIZE, A NASSIN 13 PROVINCIIS

MA I CITADINS A ÀN DISERTÂT IL REFERENDUM CONSULTÎF

Un faliment clamorôs, di là di ce che si podeve previodi. In ocasion dal referendum popolâr su la regjonalizazion de Slovenie, che si è tignût domenie 22 di Jugn, al è lât a votâ dome il 10,94% dai eletôrs, ven a stâi la percentuâl plui basse jenfri lis dodis consultazions referendariis che si son davueltis fin cumò tal Paîs dopo la indipendence dal 1991. Il referendum, che dut câs al veve dome caratar consultîf, al à viodût vinci par un pêl il “sì” ae propueste dal guvier di centridrete di fâ nassi tredis provinciis; l’esecutîf al varès di dâ il vie libar al progjet di leç definitîf dentri de metât di Lui cui nons e lis delimitazions teritoriâls indicadis su lis schedis eletorâls. Lis tredis gnovis provinciis si zontaran ai 210 comuns che a esistin bielzà, e di plui bandis si à pôre che il sisteme di aministrazion locâl sloven al deventarà masse burocratic. No par nuie, la cuestion de regjonalizazion si strissine di almancul uns dîs agns, e cun di plui si trate di un proviodiment che Lubiane e à ancjemò di adotâ par rispietâ adimplen lis normis de Union europeane.

al va indenant»

IL CANADA AL DOMANDE SCUSE AI POPUI NATÎFS

PREVIODÛTS ANCJE RISARCIMENTS PES POLITICHIS DI ASSIMILAZION

Miercus ai 11 di Jugn il prin ministri canadês Stephen Harper (te foto) al à presentât lis scusis, a non dal popul canadês, ai arlêfs dai istitûts indians pal tratament che a àn scugnût paidî vie par plui di 120 agns.

Si stime, di fat, che tra il 1870 e il 1996 plui di 150.000 fruts inuits dal Canadà a sedin stâts puartâts vie des lôr fameis e mandâts in istitûts di pueste li che no vevin il dirit di fevelâ la lôr lenghe, di praticâ la lôr religjon o la lôr culture e li che tancj di lôr a son stâts vitimis di violencis e di abûs sessuâi. Dut chest al veve l'obietîf di "canadizâ" i fruts autoctons e di "copâ l'indian" che al jere dentri di lôr.

"Il tratament dai fruts intai istitûts par indians al rapresente un brut cjapitul de nestre storie" al à declarât il prin ministri intant dal so intervent ae cjamare "Vuê o savìn che cheste politiche di assimilazion e jere falade, che e à causât tuarts grandonons e che no à di vê puest tal nestri paîs. Il guvier dal Canada si scuse sincerementri e al domande pardon ai popui autoctons dal nestri paîs par vê tradît la lôr fiducie".

al va indenant»

ARGEMÌ AL INCUINTRE LA COMUNITÂT FURLANE

JOIBE AI 3 DI LUI AL SARÀ A CJASE TUROLDO, SEDE DAL ISTITÛT LADIN FURLAN

Tal mês di Novembar cu ven si davuelzarà a Barcelone la 8^e Conference des Nazions cence Stât de Europe (CONSEU). In viste di chel impuartant event, il Comitât organizadôr al è daûr a programâ dai incuintris preparatoris tor pe Europe. Un di chescj al vignarà organizât in Friûl cu la partecipazion di Aureli Argemì (te foto), president dal CIEMEN (Centre internacional Escarré per a les minories ètniques i les nacions) di Barcelone, che ancje in cheste ocasion al sarà il braç operatîf de CONSEU stesse.

L’incuintri di Argemì cu la comunitât furlane, programât par joibe ai 3 di Lui dal 2008 aes 20.30 te sede dal Istitût Ladin Furlan “Pre Checo Placerean” li di Cjase Turoldo a Coder di Sedean (Ud), al è viert a dutis lis rapresentancis sociâls e culturâls dal Friûl, ma ancje ai singui citadins.

al va indenant»

AURELI, UNE VITE PAI I DIRITS LINGUISTICS

ESILIÂT DI FRANCO, AL À METÛT ADUN IL CIEMEN DI BARCELONE

Aureli Argemí i Roca al è nassût a Sabadell (Catalogne) tal 1936. Al è stât par cetant timp segretari dal abat di Montserrat Aureli Maria Escarré i Jané, ancje intant dal so esili a Viboldone dal 1965 al 1968.

Ativist catalanist, al à colaborât in diviersis iniziativis di resistence antifranchiste e tal 1974 al à metût adun il CIEMEN (Centre Internacional Escarré per a les Minories Ètniques i Nacionals) dulà che, cumò come cumò, al è president.

Promotôr de Declarazion universâl dai dirits linguistics e de Conference des Nazions cence Stât de Europe (CONSEU), tai ultins agns al è daûr a lavorâ par meti la cuistion dal “dirit ae lenghe” te agjende politiche de ONU.

LA UNIVERSITÂT E STUDIE UN LICÔR PE CJARGNE

PE VALADE DI DIMPEÇ A PRO DAL TURISIM AGRO-ALIMENTÂR

Creâ e produsi un licôr tipic de valade di Dimpeç (Udin) di presentâ in maniere uficiâl te ocasion de edizion 2008 de manifestazion Friuli Doc. Al è l’obietîf di un progjet che al cjape dentri la facoltât di Agrarie de Universitât dal Friûl e cualchidune des realtâts de imprenditorie cjargnele. La iniziative e je stade presentade di resint te ocasion de cunvigne “Erbe officinali e antiche piante da frutto: nuove opportunità per il turismo agro-alimentare in Carnia” (“Jerbis par curâ e pomârs antîcs: gnovis oportunitâts par il turisim agro-alimentâr in Cjargne”), metût adun de Confederazione italiana agricoltori (Cia) e de Universitât dal Friûl te suaze dal progjet Interegg Italie-Austrie “Conser-va”. Il progjet al è coordenât di Carla Da Porto, docente di Tecnologjie des bevandis alcolichis dal Ateneu furlan.

al va indenant»

CEMÛT NOTÂSI TAL "SOUL LAB – L’ANIME IN VORE"

UN LABORATORI DI ZOVINS PAR SUNÂ E CJANTÂ LA MUSICHE DI AUTÔR

Il P.I.C. – Progjet Integrât Culture dal Friûl di Mieç e il S.A.C. – Servizi Associât Culture de Comunitât Culine in colaborazion cu la Associazion MusicistiTreVenezie a àn burît fûr un avîs par une selezion indreçade a zovins cjantautôrs, autôrs e sunadôrs. La selezion par cjapâ part a un laboratori une vore interessant e origjinâl e à un dopli non, ven a stâi par inglês “Soul Lab” e par furlan “L’Anime in vore” e e je nassude cun chê di stiçâ la incressite artistiche dai zovins, di cjatâ fûr e di viodi cualis che a son lis gnovis tendincis de cjançon e de musiche popolâr e di dâ impuartance e fâ cognossi cui che al fâs musiche di autôr in di di vuê.
Il laboratori al è viert a ducj chei zovins che a àn la passion pe cjançon di autôr, pe musiche, pe poesie, pal cjant baste che a vedin finît 16 agns e che no sedin lâts parsore dai 30 dentri dal mês di Setembar. La cuote par cjapâ part ai laboratoris e je di 45€ e la domande, che si la cjate ta lis segretariis dal P.I.C., dal S.A.C. e de Associazion MusicistiTreVenezie, si à di mandâle, se si vûl ancje cul curriculum vitae e cul materiâl che si à prodot, ae direzion di pueste eletroniche musicistitrevenezie@alice.it, o pûr vie pueste ordenarie o puartâle a man dentri dai 31 di Avost dal 2008.

al va indenant»

“LYRIKE”, SECONDE EDIZION DAL PREMI

A SARAN PREMIADIS LIS MIÔR POESIIS PAR TALIAN E PAR FURLAN

Dopo il sucès de prime edizion, cun 147 partecipants e 219 componiments (76 par furlan), si svicine la scjadince pe seconde edizion dal premi di poesie “Lyrike” promovût dal Comun di Prissinins. A puedin concori ducj i poetis residents in Italie e tal Forest, dome che si esprimin in lenghe taliane (sezion A) o furlane (sezion B). Al è permetût di partecipâ a dutis dôs lis sezions e di doprâ dutis lis varietâts locâls de lenghe furlane.

Lis oparis in lenghe furlane a varan di jessi compagnadis de traduzion taliane. I concorents a son tignûts a mandâ dome tescj inedits, mai premiâts par no plui di 2 oparis par ogni sezion e dentri di ogniune sezion par no plui di 200 viers complessîfs. Il teme al è libar. A vignaran stimâts fûr dal concors, ducj i tescj che no rispietaran i recuisîts menzonâts disore. I lavôrs a varan di jessi anonims e rivâ adun cuntune buste sierade cun dentri i dâts anagrafics dal poete e i titui des oparis, metûts al recapit dal Ufici Protocol dal Comun di Prissinins, che al proviodarà a marcâ lis oparis e la buste cuntun numar progressîf e identificatîf di ogni partecipant.

al va indenant»

IL GNÛF “DIARI” AL FEVELE DI SPORT E AGHE

JESSUDE ANCJE LA “PATRIE” CHE E À RIGNUVÎT IL SÎT INTERNET

Al è in distribuzion il gnûf numar dal cuindisinâl dut par furlan “Il Diari” (te foto). La cuvierte di chest mês e je dedicade ai miôr cinc sportîfs de stagjon stade. Interessant ancje il servizi su la aghe: in butilie o di rubinet? Po dopo si cjatin plusôrs servizis di cronache e di atualitât dongje dai apontaments cu lis variis rubrichis. “Il Diari” si pues leilu ancje discjamant il pdf li di www.ildiari.eu.

Al è jessût ancje il numar di Jugn da “La Patrie dal Friûl”, il mensîl di informazion, politiche, culture, in lenghe furlane. Di chest mês i contignûts a son a disposizion "on line" sul sît dal gjornâl: www.lapatriedalfriul.org

ANAGRAFE FURLANE ON LINE

L’ARCHIVI DI STÂT DI UDIN AL PRESENTE “FRIULI IN PRIN”

Al è nassût Friuli in prin la prime bancje di dâts on line riservade ae anagrafe storiche des fameis furlanis. Metût adun dal Archivi di Stât di Udin pe valorizazion des fonts su la storie de popolazion, il progjet al à otignût il ricognossiment de Presidence dal Consei dai Ministris pe cualitât dai servizis al citadin e i son stâts ricognossûts i finanziaments de leç 482/99 su la tutele des minorancis storic-linguistichis.

Friuli in prin al è une bancje di dâts che e met adun i documents anagrafics, ju met in relazion e al ricognòs i fats plui impuartants inte biografie des gjenerazions di furlans che a àn vivût tra la seconde metât dal secul XIX e il XX. Lis fonts sielzudis par meti adun cheste anagrafe storiche a son i certificâts di matrimoni e i ats dal ufici pal militâr, che a son stâts gjavâts fûr dopo di une lungje fase di studis di bande di archiviscj, informatics e esperts di demografie.

al va indenant»